ՀՀ  Արմավիրի մարզի Խոյ համայնքի ղեկավար Լ․ Յայլոյանս, քննության առնելով թիվ 70/25 վարչական գործը՝ ՀՀ Արմավիրի մարզի Խոյ համայնքի Այգեշատ գյուղի Մայիսյան փողոց 33 տուն հասցեի բնակիչ՝ Սամվել Տելեմակի Գասպարյանին սեփականության իրավունքով պատկանող ՀՀ Արմավիրի մարզի Խոյ համայնքի Այգեշատ գյուղի Արցախի փողոց 4 հասցեում 04-011-0029-0034 ծածկագրի տակ գտնվող հողամասի վրա առանց շահագործման ակտի և առանց գործառնական նշանակության փոփոխության շինությունների շահագործման մասին, պարզեց, որ․

Սամվել Տելեմակի Գասպարյանի կողմից թույլ է տրվել Վարչական իրավախախտումների վերաբերյալ ՀՀ օրենսգրքի 54-րդ հոդվածի 2-րդ մասի և 154․2-րդ հոդվածի 1-ին մասի պահանջների խախտում /առանց գործառնական նշանակության փոփոխության և առանց շահագործման ակտի շահագործել է շինություններ/, ինչի կապակցությամբ Խոյի համայնքապետարանի վարչական իրավախախտումների վերաբերյալ հանձնաժողովի կողմից 2025 թվականի հունիսի 10-ին կազմված արձանագրության, տեղազննության ակտի, տարածքի լուսանկարների հիման վրա 2025 թվականի հունիսի 10-ին «Վարչարարության հիմունքների և  վարչական վարույթի մասին» ՀՀ օրենքի 30-րդ և 34-րդ հոդվածների հիմքով Վարչական իրավախախտումների վերաբերյալ ՀՀօրենսգրքի 54-րդ հոդվածի 2-րդ մասի և 154․2-րդ հոդվածի 1-ին մասի պահանջների  խախտման փաստով հարուցվել է վարչական վարույթ:

Խոյի համայնքապետարանի վարչական իրավախախտման դեպքերով հարուցված վարչական վարույթի շրջանակներում գործերի ուսումնասիրման,  նախապատրաստման և հաշվառման աշխատանքների իրականացման անձնակազմը՝ այսուհետ անձնակազմ, հրավիրել է վարչական վարույթի լսում։

Վարչական ակտն ընդունելու համար հիմք հանդիսացող փաստերը.

·  Խոյի համայնքապետարանի աշխատակազմը վարչական իրավախախտումների վերաբերյալ հանձնաժողովի կողմից 2025 թվականի հունիսի 10-ին կազմված արձանագրությունը և տեղազննության ակտը:

·      Տարածքի լուսանկարահանման փաստաթղթերը:

·      2025 թվականի հունիսի 23-ին վարչական գործով լսումներ անցկացնելու վերաբերյալ արձանագրությունը:

    «Վարչարարության հիմունքների և վարչական վարույթի մասին» ՀՀ օրենքով սահմանված կարգով հարուցված և իրականացված վարչական վարույթի ընթացքում գործի փաստական հանգամանքների բազմակողմանի, լրիվ և օբյեկտիվ քննության արդյունքում, բացահայտելով գործի բոլոր հանգամանքները և հիմք ընդունելով վերոհիշյալ փաստերը, վարչական մարմինը հաստատված է համարում հետևյալը.

Սամվել Տելեմակի Գասպարյանը ՀՀ Արմավիրի մարզի Խոյ համայնքի Այգեշատ գյուղի Արցախի փողոց 4 հասցեում  գտնվող, 04-011-0029-0034 ծածկագրի տակ գտնվող հողամասում առանց գործառնական նշանակության փոփոխության և առանց շահագործման ակտի շահագործել է շինություններ։

«Վարչարարության հիմունքների և վարչական վարույթի մասին» ՀՀ օրենքի 30-րդ հոդվածի 1-ին մասի «բ» կետի հիմքով, Խոյի համայնքապետարանում հարուցված վարչական վարույթի շրջանակներում 2025 թվականի հունիսի 23-ին անցկացվել է լսումը, ինչի կապակցությամբ  Սամվել Տելեմակի Գասպարյանը պատշաճ ծանուցվել է /Հայփոստ ՓԲԸ, 2025 թվականի հունիսի 11-ի LO128256739AM կոդով ստացականը/, ծանուցումը ստացել է և ներկայացել վարչական վարույթի լսումներին։

Սամվել Տելեմակի Գասպարյանը վարչական վարույթի լսումների ժամանակ հայտնեց, որ սեփականության իրավունքով իրեն պատկանող հողամասի վրա կառուցված լողավազանը և ծածկույթը կատարված է շինարարության թույլտվության համապատասխան, սակայն, անձնական ծրագրերի փոփոխությամբ պայմանավորված,  հարկ է առաջացել նշված հողամասում կառուցել նաև բնակելի տուն, որի համար կազմվում է փոփոխված նախագիծ։ Այս ընթացքում 2-3 անգամ հարազատների խնդրանքով՝ առանց շահույթ հետապնդելու տարածքը տրամադրել է նրանց մտերիմներին՝ միջոցառումներ անցկացնելու նպատակով։ Իսկ գովազդն իրականացրել է որդին՝ առանց իր իմացության։ Հրապարակված գովազդի հետ կապված պատվիրատուներ չի ունեցել։ Տեղադրված գովազդները պարտավորվում է հեռացնել գովազդային հարթակներից։

Սակայն Խոյի համայնքապետարանի վարչական իրավախախտումների վերաբերյալ հանձնաժողովի կողմից պարզվել է, որ իրավախախտումը չի վերացվել և  2025 թվականի հունիսի 27-ին, հուլիսի 5-ին գովազդները կրկին թարմացվել են։

Համապատասխան փաստաթղթերի ձևակերպման հետ կապված գործընթացներ նույնպես չեն իրականացվել։

Հաշվի առնելով վերոգրյալը՝ ապացուցված կարելի է համարել, որ Սամվել Տելեմակի Գասպարյանի կողմից կատարվել է Վարչական իրավախախտումների վերաբերյալ ՀՀ օրենսգրքի 54-րդ հոդվածի 2-րդ մասի և  154․2-րդ հոդվածի 1-ին մասի պահանջների  խախտում և վերջինս սույն դեպքում հանդիսանում է իրավախախտման սուբյեկտ:

Արդյունքում Խոյի համայնքապետարանի վարչական իրավախախտման դեպքերով հարուցված վարչական վարույթի շրջանակներում լսումներ իրականացնող  հանձնաժողովը առաջարկեց Խոյ համայնքի ղեկավարին՝ Սամվել Տելեմակի Գասպարյանին ենթարկել վարչական պատասխանատվության  և  նշանակել վարչական տուգանք՝ 550000  /հինգ հարյուր հիսուն հազար / ՀՀ դրամ:

       Վարչական ակտ ընդունելու հիմնավորումը.

Համաձայն «Տեղական ինքնակառավարման մասին» ՀՀ օրենքի 35-րդ հոդվածի 1-ին մասի 26-րդ կետի` համայնքի ղեկավարը, օրենքով նախատեսված դեպքերում և կարգով, անձանց ենթարկում է վարչական պատասխանատվության:

Համաձայն «Տեղական ինքնակառավարման մասին» ՀՀ օրենքի 42-րդ հոդվածի 1-ին մասի 7-րդ կետի` համայնքի ղեկավարը, որպես սեփական լիազորություն, օրենքով սահմանված կարգով քաղաքաշինության և կոմունալ տնտեսության բնագավառում ձևակերպում է շինարարության ավարտական ակտ, ինչպես նաև տրամադրում է ավարտված շինարարական օբյեկտի շահագործման թույլտվություն։

Համաձայն «Քաղաքաշինության մասին» ՀՀ օրենքի 25-րդ հոդվածի՝ ավարտված շինարարական օբյեկտի շահագործումը թույլատրվում է միայն շահագործման թույլտվությունը ձևակերպելուց հետո։

Վարչական իրավախախտումների վերաբերյալ ՀՀ օրենսգրքի 154․2-րդ հոդվածի 1-ին մասի համաձայն՝ շինարարությունն ավարտված շենքերը կամ շինություններն առանց շահագործման թույլտվության ձևակերպման շահագործելը՝

առաջացնում է տուգանքի նշանակում կառուցապատողի նկատմամբ՝ սահմանված նվազագույն աշխատավարձի հինգհարյուրապատիկից մինչև յոթհարյուրապատիկի չափով:

Վարչական իրավախախտումների վերաբերյալ ՀՀ օրենսգրքի 54-րդ հոդվածի 2-րդ մասի համաձայն՝ հողամասերի գործառնական նշանակությունը և հողատեսքերի ինքնակամ փոփոխելը`

առաջացնում է տուգանքի նշանակում քաղաքացիների նկատմամբ` սահմանված նվազագույն աշխատավարձի հիսնապատիկի չափով:

Ելնելով վերոգրյալից և ղեկավարվելով  «Տեղական ինքնակառավարման մասին» ՀՀ օրենքի 35-րդ հոդվածի 1-ին մասի 26-րդ կետով, 42-րդ հոդվածի 1-ին մասի 7-րդ կետով,  Վարչական իրավախախտումների վերաբերյալ ՀՀ օրենսգրքի 54-րդ հոդվածի 2-րդ մասով, 154․2-րդ հոդվածի 1-ին մասով,  «Քաղաքաշինության մասին»  ՀՀ օրենքի 25-րդ հոդվածով, «Վարչարարության հիմունքների և վարչական վարույթի մասին» ՀՀ օրենքի 53-րդ, 58-60-րդ հոդվածներով.

ՈՐՈՇՈՒՄ ԵՄ՝ 

1. Իրավախախտող Սամվել Տելեմակի Գասպարյանի նկատմամբ նշանակել տուգանք՝ 550000 /հինգ հարյուր հիսուն հազար/ ՀՀ դրամ:

2.Վարչական իրավախախտումների վերաբերյալ ՀՀ օրենսգրքի 305-րդ հոդվածի համաձայն՝ տուգանքը պետք է վճարվի սույն որոշումը իրավախախտում կատարած  անձի կողմից իրազեկվելուց ոչ ուշ քան տասնհինգ օրվա ընթացքում՝ ֆինանսների նախարարության 900325188150 հաշվեհամարին։

3.Սույն որոշմամբ տուգանք նշանակելուց հետո Վարչական իրավախախտումների վերաբերյալ ՀՀ օրենսգրքի 154․2-րդ հոդվածի 1-ին մասով նախատեսված արարքը վարչական տույժ նշանակելու օրվանից հետո շարունակելը՝

առաջացնում է տուգանքի նշանակում կառուցապատողի նկատմամբ՝ սահմանված նվազագույն աշխատավարձի հազարապատիկից մինչև հազարհինգհարյուրապատիկի չափով:

 4. Սույն որոշումը կարող է բողոքարկվել «Վարչարարության հիմունքների և վարչական վարույթի մասին»  ՀՀ օրենքի 70-րդ և ՀՀ վարչական դատավարության օրենսգրքի 72-րդ և 73-րդ հոդվածներով նախատեսված կարգով՝ դրա ուժի մեջ մտնելու օրվանից երկամսյա ժամկետում։

 5. Սույն որոշման պահանջները չկատարելու դեպքում «Վարչարարության հիմունքների և վարչական վարույթի մասին» ՀՀ օրենքի 88-րդ հոդվածով սահմանված կարգով այն ենթակա է հարկադիր կատարման՝ ՀՀ ԱՆ ԴԱՀԿ ծառայության միջոցով՝ անբողոքարկելի դառնալուց հետո եռամսյա ժամկետում:

 6. Սույն որոշումն ուժի մեջ է մտնում կողմերին պատշաճ իրազեկելու օրվան հաջորդող օրվանից կամ սույն որոշմամբ ուղղակիորեն շոշափվող անձանց վերաբերյալ տեղեկությունները հայտնի չլինելու դեպքում հրապարակման պահից, azdarar.am կայքի միջոցով: